Um mig

Ég hef lokið námi sem sérhæfður ADHD markþjálfi frá ADD Coach Academy í New York sem hefur vottun frá ICF og PAAC, alþjóðlegum fagfélögum markþjálfa.

Ég er sjálf með ADHD og því þekki ég það af eigin raun hvernig það er að lifa með kraftmikinn og skapandi en oft á tíðum kaótískan huga og hafa ekki hugmynd um hvernig hann virkar. Líf mitt tók nýja stefnu þegar ég áttaði mig á því að heilastarfsemi mín, skynjun og upplifun er um margt öðruvísi en annarra. Í gegnum námið og ADHD markþjálfun lærði ég að vera þakklát fyrir þá jákvæðu eiginleika sem hugur minn býr yfir, forvitnina og fróðleiksþorstann, ástríðuna og sköpunargleðina. Í dag myndi ég aldrei vilja skipta heilanum mínum út fyrir taugadæmigerðan heila. Það er hans vegna sem ég hef átt litríkt og skemmtilegt líf, á auðvelt með að setja mig í spor annarra, sýna samkennd og starfa af heilindum sem ADHD markþjálfi.

BAKGRUNNUR

Ég hef fjölbreyttan bakgrunn og hef komið víða við í námi og starfi. Auk markþjálfamenntunarinnar er ég með BA gráðu í mannfræði og kynjafræði frá Háskóla Íslands og Masters diplóma í dagskrár- og heimildarmyndagerð frá AAFT á Indlandi. Að háskólanámi loknu starfaði ég sem ráðgjafi hjá Stígamótum og fræðslustjóri hjá STERK, samtökum sem berjast gegn vændiskaupum, en lengst af hef ég unnið við sölu- og markaðsstörf, síðast sem markaðsstjóri Norræna hússins. Ég hef náð mér í endurmenntun og sótt ýmis námskeið, meðal annars í stafrænni markaðsetningu, jóga og hugleiðslu, lesblinduleiðréttingu, kvíða- og streitustjórnun og umsjón sjálfshjálparhópa. Öll mín reynsla og fyrri störf nýtast mér í starfi mínu sem ADHD markþjálfi.